昨晚白衫人血洗元朗，用木棍和藤條暴打市民和記者，多人受傷，市民投訴999打唔通，警察遲遲到場，事發後只有一人被帶返警署，全城怒吼！
一直撐大灣區的歌手肥媽（Maria Cordero），日前出席撐警集會怒斥高官：「你自己啲仔女又叫佢走！」有網民指她是暗黃絲；對於昨日發生的血洗元朗事件，傳媒致電肥媽，她甫接電話已泣不成聲，問到之前出席撐警集會，對於昨晚克警的表現，肥媽痛哭說：「我唔係出席撐警集會，你睇真吓我講乜嘢，我冇，我特登出嚟講，我話一家人，因為我屋企裏面，黃色又有藍色又有，點解一家人要打爛晒香港？我冇，我冇撐邊個，兩邊都冇撐，一家人兩兄弟，點解要打？」
肥媽邊哭邊抽氣說：「我屋企咁多人，一定有唔同嘅意見，我唔係撐邊個，我哋一家人，大家坐低傾，你有乜理據，佢有乜理據，點解要將成個東方之珠打爛佢呀，嗚嗚嗚！點算呀？點收科呀？唔知點算！我呢排都要睇心理醫生，我頂唔順，我真係頂唔順，睇住啲兄弟姐妹一家人，你打我，我打你，好辛苦。」肥媽喊到不能說下去，匆匆收線。
隨後記者再致電肥媽，較前冷靜的她說：「我噚晚睇住新聞，自己香港人睇到咁樣好心痛，唔知點收科，究竟佢哋要乜嘢？佢哋又可以畀乜嘢佢呢？」肥媽越說越激動，要求特首林鄭月娥出來解決：「林太，你出嚟同佢哋講吓嘢啦，係咪會好啲呢？呢班後生仔，大佬同細佬、家姐同妹咁樣打法，個家點呢？散啦喎！我好想林太出嚟同佢哋講吓嘢，希望有轉機，你明唔明呀？」肥媽再爆喊：「你哋啲大人出嚟講吓嘢啦，我六年班未畢業真係唔識，你哋讀得書多、咁大職位嘅人，可唔可以多啲人出嚟講吓嘢呢？」
肥媽不停哭訴要求林鄭出來：「我真係唔想離開香港呀，我唔想一家人走散晒，我好辛苦呀，已經食一種藥壓抑自己，而家唔夠，要食夠兩種藥，日日咁喊，我頂唔順！唔該你哋叫林太，叫啲大人，讀得書多嘅人出嚟講吓嘢啦，出嚟主持公道，我又唔識法律，又唔識乜係啱乜係錯，我唔想走呀，屋企人叫我離開香港，我真係唔想走，嗚嗚嗚，我求下你哋，出嚟同兩邊講吓嘢啦，我唔識字唔知點算唔識解決，我唔想走，唔想移民，唔想離開香港，唔該你叫佢哋出嚟講吓嘢，抒緩而家咁嘅環境呀。」
問肥媽有甚麼想同林鄭講？她邊喊邊說：「我唔識，我淨係想佢出嚟講吓嘢，係咪有幫助呢？你哋出嚟講吓嘢啦，你哋做咁高官，講吓嘢啦，我唔識點樣收科！又唔關警察事，又唔關示威者事，點解要佢哋兩兄弟打鬧，你哋出嚟講吓嘢啦；成家人都要我返廣州、返東莞，唔畀我留喺度，因為我日日睇電視都喊，而家佢哋話要收埋我部電話，唔畀我睇，我好辛苦，我已經食兩種抑鬱藥，我唔知可以點，我頂唔順啦！」肥媽淒哭：「你哋出嚟講吓嘢啦，出嚟調和吓啦，你哋做到咁高官，出嚟搞番好個香港啦，嗚嗚嗚！」
(資料來源：網上截圖/連結)