元朗昨晚有大批白衣暴徒，無法無天任意追打市民，惟警員卻疑坐視不理，最後更未有任何施暴者被捕。一向關心近日社會「風風雨雨」的商台DJ森美，今早與阮小儀等人主持節目《早霸王》時，甫開咪便說：「今朝早我冇說話好講！」
曾經住在元朗區的森美更叫大家原諒他今天的不專業及哽咽說：「今日唔可以做番平時節目會做嘅環節，我心裡面有種擔憂。」之後森美開始情緒激動爆喊：「對於我哋香港……呢個……」
身邊Marco見森美未能說下去欲先轉一轉話題：「轉頭返嚟先！」但森美堅持說下去：「我有好大嘅憂慮，我開始有少少唔明白，我開始唔明白每一個人嘅身份要做啲乜嘢先能夠令香港變番香港，我希望香港每一個都努力。」接着節目播出陳慧敏首《沉默之間》。
今日節目變為讀聽眾留言及播歌，森美用沙啞的聲音講：「喺我哋生活當中需要一個好安定的社會先可以畀我哋正常咁生活，喺今日個節目當中我嘅情緒可能唔係太穩定，同大家講聲唔好意思！喺呢個情況下，希望盡量用音樂播畀大家聽，減少對大家嘅影響。」不少聽眾在討論區留言，表示聽到森美喊都忍不住流淚，而森美讀出的其中一封信，包括一位自稱紀律部隊的聽眾，表示昨晚打了10幾次999，但完全未能接通，他也感到十分無奈，叫香港人要加油。
(資料來源：網上截圖/連結)
